பள்ளிக் கல்வி என்பது ஒவ்வொரு மனிதனிற்கும் வாய்க்கப்பெற்ற வரப்பிரசாதமே. ஒவ்வொருவரது வாழ்க்கையிலும் மிகப் பெரும் தாக்கம் செலுத்தும் பிரதான காரணிகளில் பள்ளிக் கற்றல் என்பது தவிர்க்க முடியாததாகும். ஊட்டல் கல்வியில் இருந்து சுயகற்றல் வரைக்கும் தன்னைத் தான்வாழும் சூழலுக்கும் சமுதாயத்திற்கும் உகந்ததாக தயார்ப்படுத்திக் கொடுக்கும் ஒரு மூலதனச் சந்தையே இப் பள்ளிகள், கல்லூரிகள் ஆகும். மாறிகள், மாறிலிகள் நிறைந்த மனித வாழ்க்கைப் பயணத்தில் மிகச் சிறந்த ஒரு மாறியாகவும் அங்கே பெற்றுக்கொண்டவைகள் அதன் விளைவுகள் காலம் கடந்தும் மாறிலிகளாக திகழ்வதெனின் அது பள்ளிக் கல்வி மாத்திரமே. 

பள்ளிக் கல்வி என்பது நம் அனேகரின் பார்வையில் தென்படுவதுபோல் அன்றி, ஒரு மனிதனின் வாழ்க்கை தொடர்பிலான ஒவ்வொரு சந்தர்ப்பத்திற்கும், பிரச்சினைகளுக்கும் முகங்கொடுக்க தங்களைத் தாங்களே தயார்ப்படுத்தும் தளமாகவே ஆரம்பிக்கின்றது. சமூகப் பிராணியாக தோற்றம் பெறுதல், தொழில் வாய்ப்புக்களைக் கண்டறிதல், உறவுகளை உருவாக்குதலும் பேணுதலும், மற்றும் உலகத்தைப் புரிந்துகொள்ளுதல் முதலிய மனிதப் பிறவியின் எண்ணற்ற அர்த்தங்கள் விளைவிக்கப்படும் ஒரு ஊட்டல் நாற்று மேடையே பள்ளிகள், கல்லூரிகள் ஆகும்.

இவ் ஊட்டல் தொழிற்ப்பாடுகளில் கணிசமான பகுதியை பௌதீக வளங்களே வழங்குகின்றன. எமது கல்லூரிக்கு வாய்க்கப்பெற்ற பெரும்பாலான பௌதீக வளங்கள் நீங்கள் அனைவரும் அறிந்ததற்கமைவாகவும், உணர்ந்ததற்கமைவாகவும், உண்மையாகவும் கடந்த நூற்றாண்டுக்கு உரியவைகளே. இவைகளில் பொருத்தமான தெரிவுகளின் ஊடாக நகர்ந்து இன்றைய காலச்சூழலுக்கு மிகவும் அவசியமானதொரு கட்டுமானத்தை நல்கவேண்டியது எமது அனைவரதும் தலையாய கடமையாகும். இந்தச் சூழலிலேயே நாளை நாமும் எமது தலைமுறைகளும் வாழப்போகின்றோம். நிகழ்காலம் சிறப்புடன் இருந்தால் எதிர்காலத்தினைப்பற்றி கவலைகொள்ளத் தேவை இல்லை. நிகழ்காலத்தில் எம்மை எமது சமூகத்திற்காக தயார்ப்படுத்தவேண்டிய அத்தியாவசியம் தவிர்க்கமுடியாதது.